يامجرم زمانك خاف ربك عــاد
انترس قاموس جرمك وانمله جلاده
خلــصت الخلك يل ما الك رداد
مـــاكو احد يردك كمت تتماده
اذا تمشي تروج الكاع من ممشــاك
واذا تـــوكف تسبب هزه رداده
مــن اتمر جحافل جن اشوف وياك
وآصف شفته يمك حشد القــاده
خضعتلك ابـــاطر والقياصر خوف
صارولك عبيد وجـــانو الساده
يعمي نخاف منك داخلين اعليــك
شاره وبخت عندك فاقت السـاده
نـتـعناك كلنه لمجلسك حـفـاي
نـتـــبرك وكلمن يطلب مراده
يالنظرات عينك تسبق الاعــصار
وخزراتك تفلش حصـن طرواده
يالشعرك سواد يغطي عين الكـون
جفل قرص الشمس لن نوره مافاده
شلال اعله راسك مو شعر مسدول
بس شلالك اسود يخرق العــاده
يالوجهك حليب ودرته غزيـلات
انصع من بياض الكطن وزيــاده
وجناتك صبح مابيها رصعة ليـل
واذا شافك يتيه الكمر مشـراده
عرجون الحواجب قوس جر نشاب
كمل نص دائره ومتوازنه ابعـاده
يالحلكك يــماثل خاتم اسليمان
التختمه بشفتك ينقلها لحفـاده
يالصدرك مجره وبيه كواكب تـوم
كل كوكب يجتف الثاني بصفـاده
على صدرك افق مو خط افق موجود
واتوسم الطيف بفرضته اكــلاده
يفرق دين بوذه وبوذه دين النــار
وبوذه الحسن انته بعين عبـــاده
ياساحة جهاد المات بيها يــفـوز
كل واحد ركـض رايد استشهاده
كلمن شاف حسنك شاف ملج الموت
عزرايين يمك صـــار مكعــاده
من تفتر تفر الكــون كله ويـاك
ويغيب الكمر مـن كبـل ميعاده
تصير الكـاع الك نفاثه من تسـير
تحتك تنطوي وتنكلب سجــاده
افراش الكاع صارت ريش نعامات
واتدله الجبل عد راسك اوسـاده
ولك كلبي انسجن بين الثنايا ومات
ابطن ثغرك سجن والشفه جلاده
الرئيسية 
موضوع: يـــــامجرم زمـــانك خـــــاف ربــــــك عـــــــــاد 
