برواز قديم
********
نفسي فـ قطر زمان
يرجع ياخودني بعيد
لـ أرضي والأوطان .. لنْهار فيوم العيد
أمسك قروشي فـ إيد
وامسك ايديكي فـ إيد
انسى الهموم فعنيكي
واشكى العيال واشكيكي
أرمي القروش لو هزعل
وِانْ تزعلي أراضيكـــي
اقطف ورود ما بتدبل
تطرح شجر فإيديكي
نفسي فيوم المولد
وحصاني لـ عروستك
ويقولوا تاه في المولد
تناديني تنهيدتك
ارجع وانا المشتاق
اخدك في أحضاني
تقوليلي مش هلعب
يلا صوباع فـ صباع .. خاصم لأحلامي
غرب وطير لبلاد وأنا هبقى في مكاني
نداهه تندهلك بتروح وتنساني
ابكي وانا الغلطان تاخديني من تاني
نفسي وانا عارف
لو يوم رجعت هناك
هرجع وانا خايف
القى الحنين أشواك
والقى الأمل زايف
ضاعت ليالي العيد
وضعت انا فيها
شايف طريقي بعيد والخطوة مكسورة
وباقي م التنهيد
برواز نحاسي قديم وانا وانتي فـ الصورة
*
*
*
الرئيسية 
موضوع: برواز قديم 
